Chusticia ta ra nueit d'almetas

Paraz cuenta bell uns,

bell uns, paraz cuenta.

No siga que hue,

 ista nueit d'almetas

se'n faiga d'orache;

se'n faiga de brempas;

y tos trobetz en casa;

 y s'ascuiten xeras,

que dillá n'o mont,

muitas tos asperan.

Asperan ufanas

 a que paretz cuenta

pos quan ixo pase

 y ra xera encienda:

deixará as cunetas

 d'ixas carreteras,

y fendo camín

 enta casa vuestra,

s'aluenyará d'os cados

 y tamién d'as fuesas

an son amagatas

 as vuestras verguenyas.

A paz sin Chusticia ye violencia silenciosa

Xera qu'encendallan

totas ixas penas

vadiará ros ríos,

 trescruzará arboleras.

Se'n ferá sentir

n'as nuestras carreras

y quan astí arribe

n'ista neuit tant frieda,

mos podrá alumbrar

y escalfar en veras.

Paraz cuenta, caciques,

 paraz cuenta,

no siga que hue,

n'ista nueit tant preta

demanen chusticia
as viellas almetas.

Piensa creyativament, mete ficacio!.

"...9. A presona meya ye plenament inocenta d’o pensar fundament. Ella accepta ras ideyas d’otris, y ras secundia, en traza muito parella a com’un loro; isto se puet veyer facilment quan replecamos o metodo feito servir ta farchar o pareixer común, y ista actitut dócil per parti d’a gran mayoralla que sembla perfectament presta ta deixar qu’unas pocas presonas piensen per ells, ye lo que premite ta uns poquetz en a mayoría d’os países usurpar o poder y mantener a millons chusmesos. O pensamiento creyativo enanta d’o nuestro ficacio..." 

...9. The average person is entirely innocent of any deep thinking. He accepts the ideas of others, and repeats them, in very much the same way as a parrot; this is readily seen when we understand the method which is used to form public opinion, and this docile attitude on the part of a large majority who seem perfectly willing to let a few persons do all their thinking for them is what enables a few men in a great many countries to usurp all the avenues of power and hold the millions in subjugation. Creative thinking requires attention ...

Capítol 23

A Clau Mayestra //

  The Master Key System

Charles F. Haanel 

A prebatina de Wörgl: una moneda alternativa local

En l’anyo 1932, meyada a Gran Depresión, a  chiqueta ciudat de Wörgl experimentó de traza guaire satisfactoria con a suya  propia moneda local  (chus a farcha d’apocas certeficadas con guarancia  de trafico). Alazetada en os pensamientos economicos de Silvio Gesell, un economista de primerías d’o sieglo vente, a prebatina estié prencipalment disenyata ta estimular l’economía local. Manimenos, tamién adubié de camín a reacomodar a  población  esqueferada con a crisi, inspirando a muitas atrás comunidatz con o suyo eixemplo. Con tot y con ixo, l’experimento de Wörgl estié feriosament viedato en 1933 per o Banco Central austriaco.

Michael Unterguggenberger
Alcalde de Wörgl1884-1936

Contino ye ra hestoria d’o “miraglo de Wörgl”  igual como ye recentata en “L’Esdevenider d’os Diners” per Bernard Lietaer March  (pach 173)

Portugal ye farto: "O povo é quem mais ordena"

O primer ministro portugués, Pedro Passos Coelho, charraba fa no guaire en o debat quinquenal con os deputaus d'ixe país arroclaus en sesión plenaria, quan estié interrompito per o publico que en yera en os costaus d’a cambra y que encetó a cantar “Grândola Vila Morena", a canta que pretó o fuego inicial d’a Revolución d’os Clavels. Allora, o Movimento das Forças Armadas la esleixié  ta restablir un rechimen democratico en o país, fendo-la servir en transmitir per Rádio Renascença a sinyal t'a sublevación. Asinas,  ista canta, que encetó l’etapa democratica portuguesa, metié fin a ra dictadura salazarista de l’Estado Novo. 

Estié, ista vegada, una acción protagonizada per os activistas d’a colla Que se Lixe a Troika, Que se flora ra Troika, integrada en a movilización ta ra graniza manifestación que se’n ye parando en Portugal ta ro 2 de marzo. Manifestación en protesta d’as retalladas gubernamentals y d’as imposicions foranas d’a Troika (BCE, Comisión Europeya y FMI). Troika que fastia a ro pueblo portugués y que ha levato a Portugal enta ra miseria y ra graniza depresión que en pateix. 

Os ricos no creyan emplegos

En marzo de 2012, l’establidor de Amazon y gear.com, Nick Hanauer, un d’os inversors més importants d’os Estatos Unitos, amaneixié en a conferencia organizada per o TED ("Technology Entertainment and Design") debant d’un publico composau per bell uns d’os  més importants interpresarios estatounitenses y dicié: 

“Si ye verdat que mantener baixos os impuestos d’os més ricos fese més emplegos, enguán serbanos fandius d’ofiertas de treballo”. 

Manimenos, no ha sito dica fa bell pocs diyas que o popularment coneixiu como TED, reputau organismo adedicau ta organizar charradas mainadas ta ras elites, decidié  no publicar o vidios d’a suya partecipación,  en considerar-lo inapropiau, polemico  y  partidista.

En a suya conferencia, Hanauer, esfendeba a puyada d’impuestos dentre as clases més podients de Estatos Unius, ya que no son ellas, sino a clase meya,  entrepenedora y consumidora  de vez, qui produix  més puestos de treballo. 

“He comencipiato u aduyato a encetar ducenas de negocios y he  contractato un fascal de chent. Pero si dengún no hese  tenito de diners ta mercar lo que ufribanos, totz ixos negocios s’haberban esvaneixito y con ells, os puestos de treballo” quaternaba  l’inversor. “ixo ye por  lo que puet dicir con confitanza que ros ricos no creyan treballo ni fan negocios, ni grans ni chiquetz”.

John Ralston Saul: O Colapso d'a globalización y ra reinvención d'o mundo

Ista semana l'entrevista d'o País Semanal estié guaire intresant: l'entrevistau yera John Ralston Saul,  escritor, asayista y filosofo canadiense qui estié calificato como "profeta" per a revista Time. L'obchecto de ra entrevista yera charrar con ell d'economía. A suya frase destacada: "No bi ha ragón ta salvar a ros bancos".

Una cita poderosa endreza o suyo zaguer libro O Colapso d'a globalización y ra reinvención d'o mundo en a suya versión recient en castellán: "Encara no he capito enterament perqué escaixié. Alan Greenspan, 23 d'octubre de 2008" A frase de l'exdirector d'a Reserva  Federal estatounidense da ra mida d'a narcada que ha creyata ra crisi. Mesmo d'entre aquells que l'acoboron. Y a ixa narcada ye a lo que s'en vien concarando iste pensador canadiense que nada ta contramán.

Ragons ta ra rebeldía

L'actor Willy Toledo ye un viello coneixito d'os meyos de televisión ta qui tenemos ya una edat. Estié  un protagonista d'a serie de Tele 5  "Siete vidas" (amés de bella pericla de cierto exito) que remezclaba en traza de comeya os afers de siet presonas enreligadas en una vida común. 

Manimenos l'actor ha protagonizato en as zagueras anyadas uns capitols d'a suya vida que fan que ya no li veigamos muito en a televisión como serba menister fendo-nos arreguir u plorar como enantis. Agora ye una d'as pocas  presonas que se premite o luix de dicir  lo que'n ye pensando. Pecau imperdonable ta bell uns que ya no li veyen como lo  que en realidat ye -un gran actor- sino como un perigloso activista d'a extrema cucha que no cal que amaneixca per os meyos.

Perque creigo que represienta platerament o sentir de qui escribe-ie amés de muita atra chent que no gosa meter en parolas os suyos preixins sobre lo que'n ye escaixindo, meto astí un vidio que suscribo en gran mida con as suyas opinions y aprofito a publicitar o suyo libro que ye asabelo d'intresant y controvertiu "Razones para la Rebeldía" y que estié prelogato per o mayestro y politico de cuchas Julio Anguita..

Con iste libro, Willy Toledo repasa  a suya vida como activista, as suyas ragons ta una indignación remanent, asinas como as suyas opinions que'n ye escaixindo en o mundo, Espanya, a politica, os suyos companyers actors, a ley Sinde, y atras  questions d'actualidat politica y social d'os nuestros diyas.

Ta ra caverna

O mito de Platón mos sinyala ra hestoria de qualques hombres encletaus en una espluga a on no bi ye que brempas y un fuego dezaga. A realidat exterior prochecta ixas brempas adintro ra espluga en esnavesar o fuego. Os hombres prisioners, no veyen atra cosa que uembras.

Platón mos amostra en o mito quánto de furona en ye ra realidat que veyemos y quánto ye de susceptible ra naturaleza humana que s’aconorta con una anviesta cegallosa d’a suya redolada enca siga irreal, tant y mientres en siga acceptada per una burniega mayoralla.