12 de març 2013

A prebatina de Wörgl: una moneda alternativa local

En l’anyo 1932, meyada a Gran Depresión, a  chiqueta ciudat de Wörgl experimentó de traza guaire satisfactoria con a suya  propia moneda local  (chus a farcha d’apocas certeficadas con guarancia  de trafico). Alazetada en os pensamientos economicos de Silvio Gesell, un economista de primerías d’o sieglo vente, a prebatina estié prencipalment disenyata ta estimular l’economía local. Manimenos, tamién adubié de camín a reacomodar a  población  esqueferada con a crisi, inspirando a muitas atrás comunidatz con o suyo eixemplo. Con tot y con ixo, l’experimento de Wörgl estié feriosament viedato en 1933 per o Banco Central austriaco.
Michael Unterguggenberger
Alcalde de Wörgl
1884-1936

Contino ye ra hestoria d’o “miraglo de Wörgl”  igual como ye recentata en “L’Esdevenider d’os Diners” per Bernard Lietaer March  (pach 173)




Una d’as millor coneixitas aplicacions d’a ideya d’una moneda alternativa local  estié prebada  en a chiqueta localidat de Wörgl, Austria, allora con una población  de 4.500 presonas, alto u baixo.  Quan o sinyor Michael Unterguggenberger (1884-1936) estié esleixito o suyo alcalde, a ciudat teneba 500 presonas esqueferadas y unatras 1.000  presonas esqueferadas viviban en os  suyos arredols. Antiparti, 200 familias yeran fallitas de raso. L’alcalde d’o largo nombre (como li diciba ro Profesor Irving Fisher de Yale) yera famillarizato tamién con o treballo de Silvio Gesell y decidié estinar-lo.

Unterguggenberger teneba un amplo listau de prochectos que deseyaba acometer (dende sollar carreras, establir un sistema cheneral de distribución d’augua ta ra ciudat entera, a planta d’arbolau en a carrera y unatras arrepetazadas amenistables). Teneba tamién muita chent disposable que’n yera deseyosa de participar y capable de fer todas ixas buixadas. Manimenos, només en teneba 40.000 chelins austriacos en o Banco,  tasament una titada ta tot lo que s’amenistaba fer.

En cuenta de gastar os 40.000 chelins en prencipiar o primer d’o suyo largo listau de prochectos, decidié meter os diners en un deposito con a caixa local d’estalvios como guarancia ta expediar apocas certeficadas d’a propia localidat de Wörgl per una valgua equivalent de 40.000 chelins austriacos.

Allora, en facié servir ixas mesmas apocas certeficadas con guarancia de trafico ta bosar o suyo primer prochecto. Como ras apocas amenistaban estar esvielladas cada mes (a un coste d’un 1 % d’a suya valgua nominal), tot qu’en yera  perpagato con ellas s’aseguraba de vez de gastar-las ascape guarnindo automaticament treballo ta otris. Quan a chent se quedaba sin d’ideyas  de que cosa fer ta gastar as suyas apocas certeficadas mesmo dedidiban perpagar as suyas peitas enantis.

Wörgl estié a solenca  ciudat austriaca que sapié concarar correctament os extrimeros nivels d’ature que se’n patiban per todas partis. A la fin, no soque solloron as suyas carreras y construyoron un nueu sistema  d’augua corrient y toda ra resta de prochectos en l’amplo listau d’o alcalde Unterguggenberger, sino que mesmo financioron a construcción de nueva vivienda, un trampolín d’eskí y un puent con  una argüellosa placa commemoratoria que’n diciba: “Iste  puent estié construyito con a nuestra propia  libre moneda”. Sies poblacions d’a redolada copioron iste sistema, y una d’ellas estié capable de construyir una piscina monecipal  con as ganancias. Mesmo o primer ministro francés, Ëdouard Dalladier, lis rendó una vesita  oficial  ta presenciar de primera  man “o miraglo de Wörgl”.

Ye alazetal replecar que ra parti més gran d’os nueus emplegos no se debié dreitament a ros  prochectos de l'alcalde (como  sí que’n estié ro caso d’o New  Deal de Roosevelt, per eixemplo). A més gran parti d’o treballo creyau estié furnito per a circulación d’a moneda alternativa dimpués que ras presonas contractadas per l’alcalde lo gastasen. De feito, cadagún d’os chelins expediatos a traviés d’iste sistema creyó dentre 12 y 14 vegadas més d’emplegos que ros chelins tradicionals que circulaban parellament! Iste sistema, disenyau como una  mida anti-amogolonamiento, contrimostró estar asabelo eficient en a creyación espontania  de treballo.

Apocas certeficadas de Wörgl
O sistema de moneda alternativa d’a ciudat de Wórgl estié tant exitoso que se copió, en primeras en a vecina ciudat de  Kitzbülh en Chinero de 1933. En chunio d’ixa mesma anyada, Unterguggenberger facié un mitin con representants d’atras 170 ciudatz y villas. Poc dimpués, 200 ciudatz austriacas quereban emular-lo. Estié en ixe inte quan o Banco Central, atucau per a grandaria que preneba l’afer, decidié fer valer os suyos dreitos de monopolio. A chent facié demanda cuentra ro Banco Central pero a demanda estié redrata  en un chudicio celebrau en noviembre de 1933. As venients clamaduras plegoron dica o Trebunal Supremo Austriaco a on se'n redró definitivament. Dimpués d’ixo, fer una moneda alternativa estié tipicicato delicto en Austria.

Asinas pos, Wörgl habié a tornar a ro suyo 30% d’ature. En 1934, una sobatida social cheneralizada esclató en toda Austria. Mientres a represión sozsiguient totz os partius de cuchas estioron ilegalizatos. O partiu de  Michael Unterguggenberger estié trigato d’ixa  traza y l’alcalde quedó relevato d’o suyo cargo. Morié en 1936 encara muitismo  apreciau   per os suyos vecins.

En resulta familiar, que no? Només una autoridat central salvadora puet aduyar a una chent quan no lis se premite aduyar-se'n ells mesmos. Y como totz os economistas sinyalan, quan bi ha abastable demanda, l’amanidura cutio s'estableix de bella traza. Mesmo quan se’n ha d’importar.

Mientres l’Anchsluss de 1938 un amplo percentache d’a población austriaca saludó a  Adolf Hitler como ro suyo salvador politico y economico.

A resta en ye ya una hestoria bien coneixita…

Cap comentari:

Publica un comentari a l'entrada

Dixa o tuyo comentario astí