12 de set. 2012

Aragón n’a Crucitalla.


Un diya  tasament ye pasato deinde qu’os  vecins catalans decidioron chuntar-se n’as carreras ta dicir que son fartos d’espanyolismo rancio y que cal crebar con l’Estau espanyol y fer-ne uno propio.



L’exprisión d’o pueblo catalán feita en as carreras y plazas estié  graniza u mesmo masiva como totz podiemos veyer en as imachens  d’a prensa.  Més d’a metat d’os cuidadans catalans están prestos ta ra independencia seguntes as zagueras enqüestas. Per tant, en qualsiquier inte mos poderbanos trobar una declaración d’independencia  y una fallita d’o sistema autonomico.

Tot isto alcurre de vez que deinde Madrit  surte una corrient anti-autonomista que pretende fer recular as Autonomías en as suyas competencias  (salut y amostranza prencipalment, per estar as més senyaleras y o  prencipal gasto autonomico ) u mesmo  vuedar de conteniu  as suyas prencipals funcions socials. Ista corrient ye chupindo per as ringleras més  espanyolistas  -y conservadoras- que bi ha n’Aragón como en atrás comunidatz y tot isto, de conchunta con a mayoría de ruello que en tienen os nacionalistas espanyols  me fa alticamar-me per l’esdevenider d’Aragón como entidat  politica autonoma.


Ye una gran verdat que o  sentir autonomista  d’Aragón s’ha exprisato deinde antigo y que o nacionalismo aragonés ye un nacionalismo historico que cadagún en ista tierra vive de traza propia: bell uns como  independentistas; bell atros como federalistas; y qualques  goyosos con o sistema actugal sin cambear garra cosa.

Manimenos, ye menister sinyalar qu’a nuestra autonomía –igual como a resta- ye naixita y  s’ha desenvolicato en a uembra  d’s empentes nacionalistas de catalans y vascos.  Con istos vecins difuera d’a ecuación bi habremos de tremolar aquells qu’aimamos un  Aragón senyor d’a suya destinada y mesmo aquells aragoneses que s’acontentan merament con estar un ente autonomico sin guaire poder competencial.


En bell inte bi’n habrá que decidir que traza de entidat call d’estar Aragón, si estamos prestos ta consentir a perda d’unas competencias que costoron tant d’adubir y que guarancian a fesabilidat de l’Estau d’o Buempasar, u si estamos encara capables d’esbulligar-nos d’o acitau nacionalismo espanyol que lo abasta tot,  y refirmar o nuestro sentir y voluntat como pueblo.

Muitas cosas son en risque: no soque una propia traza de sentir sino que tamién a nuestra salut, a nuestra educación, a nuestra cultura, as nuestras luengas, a nuestra capabilidat de gubernarnos sin rendar cuentas ta otris,  a nuestra identidat nacional. En definitiva  ye o nuestro amor propio ixo que se chuga en istos diyas de funda crisi economica y retalladas imposadas deinde alto sin ni sisquiá preguntar-nos pon.

Enguán, quan muitos compatriotas son estrolicando d’os vecins per a suya celebración d’a Diada Nacional,  allens a ro periglo que s’amaga dezaga d’ixe anticatalanismo, call parar cuenta d’o que viene no siga que de botivoleyo mos quedemos sin voz ta creticar ixo que atros fan y nusatros no gosamos de sonyar sisquiera.

Mientres que enguán os catalans  emparan una manifestación soberanista  con gran exito, maitín poderba estar ya tardi ta nusatros.


Cap comentari:

Publica un comentari a l'entrada

Dixa o tuyo comentario astí