IRPF: Ilesia Catolica y as fins socials

Ye important estar conscient  de lo que suposa marcar bell una d'as casiellas que amaniexen n'a declaración de l'IRPF.

Cara to que dice a Ilesia catolica, marcar bell una d'istas casiellas no ye anodín ta la nuestra economía sino que suposa una esmerma d'a capabilidat de l'Estau ta financiar o gasto social que a totz mos  pertoca. Europa Laica lo explanica d'ista traza:

Marcar a casiella d'a Ilesia Catolica suposa:

1- Contrebuyir a achiquir a tuya alportanza ta financiar os servicios publicos (sciencia, sanidat, educación, gastos socials, emplego,...) Pos esbarra o 0,7 % d'o tuyo IRPF ta financiar os chornals y a Seguridat Social de Bispes y 20.000 mosens catolicos, ta mantener funcionando as suyas parroquias, establimientos y ONGs de toda traza, facultatz eclesiasticas, a universidat Pontificia de Salamanca, Obra Pía, seminarios, arrocladas y as suyas careras campanyas d'esbandidura tractando d'imposar a suya particular moral a toda ra sociedat. Antimés, a ilesia s'esquimenará d'a crisi en a declaración d'ista anyada, pos a puyada de l'IRPF feita per o PP, en incrementar a pinyora en cada trango, puya a Base imposable y, per tant, a quota integra, rancando de quala se calcula ixo que se esbarra enta ella.

2- As diocesis han pasato a tener-ne un defícit, al respective on que ellas mesmas alportan, d'o 800% en 2007 ta lo 1.245% en 2009. En un país a on o defícit d'as institucions publicas ye encletau en o 5,3%  (l'Estau) u quasi o 0% (os Concellos), que bi-sigan unas institucions privadas, como están as diocesis catolicas, con iste monstrugoso defícit, patiu per totz os contrebuyents, resulta atentatorio cuentra a chusticia y a igualdat. Antimés, d'estar inmoral.

3-Asinas  no contrebuyes pas en condicions d'igualdat t'os gastos publicos (art. 31 d'a Constitución) y fesabilitas que se discrimine més encá t'as atras creyencias y conviccions, sigan u no relichiosas (art. 14 d'a Constitución).

4-Antimés yes brindando o tuyo aconortamiento ta que a ilesia catolica  s'apropie de ONCE MIL millons d'euros d'os Presupuestos de l'Estau,  qualo suposa més d'o 30% d'os recursos adicionals que proposa obtener o Gubierno t'os Presupuestos de 2012. Y ixo, ta financiar o culto, y a esbandidura catolica, t'os funcionarios catolicos en quartels, garcholas y hespitals, catecaires en centros publicos y a financiación d'a amostranza privada catolica y atros establimientos catolicos de diversa natura; o mantenimiento d'o patrimonio d'a ilesia, més o gasto, en os ingresos, per as granizas eixencions de peitas y bonificacions fiscals de toda traza, que suposa ta ros concellos, Comunidatz Autonomas y l'Estau Central.

5- Espleitar d'istos previlechios en 2012 ye una grau sinchusticia, asinas como un atentau t'a ra libertat de concencia y t'a ra igualdat de tracto a totz os ciudadans, en un país constitucionalment aconfesional. Manimenos en istos intes de grau crisi economica, con més de 5 millons d'aturaus y frontals enrestidas ta ra sanidat y l'amostranza publicas, asinas como t'os dreitos d'as mullers, presonas dependients y demés sectors socials, resulta inmora, y insolidario qu'a institucion catolica "suce" una cantidat superior  d'o 1% d'o nuestro PIB.

Quatre eixemplos de desigualdat de tracto y discriminación:

1) Tant y mientres o gubierno d'o PP pretende estalviar 16 millons d'euros deixando sin d'aduya cada anyada a unos 75.000 chovens con ingresos inferiors a 22.000 euros anyals, bosa a Seguridat Social de mosens y bispes per un importe superior a 18 millons d'euros.

2) Tant y mientres   "l'Estralaz" d'os servicios socials d'aduya t'os dependients pretende estalviar 100 millons d'euros, no se fica denguna privación ta subvencionar os chornals d'o clero con més de 155 millons d'euros.

3) Os 900 millons que ha amputau o Gubierno d'o PP  ta Aduya a lo Desenvolique (cuentra a probeza) tasament abastan ta os més de 1.000 millons que plegarban de bosar a Ilesia Catolica l'IBI d'os suyos inmuebles y propiedatz.

4) Os 600 millons que patirán  as retalladas en os presupuestos de sciencia y investigación concaran con os més de 600 millons que se bosarán a catecaires catolicos en centros d'amostranza publicos y en os achustaus.

Tampoc no i semos d'alcuerdo con marcar a casiella destinada a fins social:

1- Ista casiella se ficó -encetalment. como contrapeso d'a casiella d'a ilesia catolica, ta que no sobresalise tant o previlechio eclesial, pero debant d'a suposata competencia que li feba se independizoron, contando deinde allora cada casiella con o mesmo percentache, esqueminando-se d'ista traza as organizacions catolicas de més de 120 millons adicionals.

2- As fins socials están una "quistión d'Estau" y cal que feguren en os Presupuestos como resultau d'o debat presupuestario democratico a resultas de l'intrés cheneral. Asignar-ne a traviés d'una casiella os chusmete a discreccionalidat, resulta arbitrario y os deixa a lo marguin d'os enantamientos que guarancian l'obchectividat y equidat en a suya atorgadura.

Con istos previlechios ta ras creyencias catolicas, l'Estau incumple o mandato constitucional de guaranciar a libertat de concencia.

En un Estau presunctament aconfesional, a pluralidat de creyencias cal que siga financiada per as presonas que creyen en ellas y NO PAS per l'Estau. En caso contrario, ditas creyencias particulars, as bosamos totz os ciudadans y ciudadanas, a traviés d'una considerable esmerma d'as finanzas publicas.

.