A Crisi financiera explanicada con somers.

Un sinyor s’endrezó bell diya ta un lugar chicorron a on no bi heba estato mái y ofrié t’os suyos habitants 100 euros per cada somero que li vendisen. Buena parti d’a población li vendié os suyos animals.

 Dos diyas dimpués en tornó t’allá y ofrié millor pre, 150 per cada someret, atro tant d’a población li vendié os d’ells.

A semana venient retornó unatra vegada y ofrié 300 euros y a resta d’a chent li vendié os zaguers somers. En veyer que no bi heba més d’animals, ofrié 500 euros per cada someret, aparentando que los ne mercarba en a venient vesita t’o lugar, en dos semanas ent’abant, y se’n marchó.

 Una parella diyas dimpués, en ninvié un aduyant con os someretz que enantis bi heba mercato, ta ro mesmo lugarón y lo recau d’ofrir os someretz a 400 euros cadagún. Asinas que muitos en demanoron diners ampraus ta poder mercar més someretz. Mesmo en mercoron totz os someretz d’a redolada.

Como yera de dar, l’aduyant s’esvaneixié con os diners cobraus, igual como ro sinyor, que evidentament, no en tornó en as venients semanas, y mái no amaneixioron.

 Risultau:

 O lugarón quedó empliu de someretz y d’endebdaus, u seguntes se uelle, de someretz endebdaus.

Isto escaixié dimpués:

• Totz os que heban demanato diners ampraus, en no vender os someretz, no podioron retornar os ampres.

• Qui heban amprato de diners, se queixoron t’o Concello en dicindo que, si no podeban cobrar, fallitarban y, per tant, no poderban continar amprando y isto alcarba, en zagueras, ta tot o lugarón.

•  Ta qu’istos amprers no fesen fallita, l’alcalde, con os fundos monecipals d’as peitas locals y l’asignación d’os presupuestos provincials, en cuenta de donar os diners t’as chents d’o lugar, lo se donó t’os mesmos amprers. Manimenos istos, en ya cobraus gran parti d’os diners no perdonoron as debdas a los d’o lugarón, que en continoron igualment d’endebdaus y sin guaire capabilidat de retornar os ampres.

• L’alcalde malfurrió o presupuesto d’o Concello qu’en quedó igualment endebdau. Allora en demanó diners t’atros concellos, manimenos istos li dicioron que no podeban emparar-li perque en estar fallito, no poderban cobrar dimpués tot ixo que li amprasen.

En zagueras:

• Os agudos d’o prencipio, igualment d’aforraus.

• Os amprers con suyos esquimens resueltos y un fascal de chent a qui continar cobrando os ampres amés d’os intreses, mesmo fendo-sen amos d’os ya devalguaus someretz que mái no abastarán ta cubrir tota a debda.

• Muita chent fallita y sin de somero ta ra resta d’a suya vida.

• O Concello igualment fallito.

L’alcalde se pensó que en teneba que escar bella solución. Ta prebar de disempandullar tot isto y salvar o lugarón, o Concello paró achustes y reformas como achiquir as horas de gasto d’augua d’as fuents publicas, tallar a luz de lampas y follancas,  desenchegar os escalfadors d'a escuola y l'ambulatorio, trancar a Casa d’os Chubilatos, baixar os chornals d’os suyos treballadors...

Fuent: Bloc d'Antonio Sanjuán.