Quan o gubierno d'o PP se planteya puyar d'entre atros impuestos tamién l'IVA, més pareix un matasans que no sape a on ye a surtida que un partito politico aplicando o suyo pograma electoral.
En verdat, o suyo pograma s'oposaba a una puyada de l'IVA de traza radical. Puyar l'IVA suposa pos crebar unatra promesa d'as que se facioron a ros suyos votants. Y ya están ne muitas. Pero ta ells, rai pos ye esclatero qu'as promesas vuedas que PPSOE fan en publico cal de leyer-ne perén en clau electoral. Os suyos votants capian isto a l'inte y li dan a valor només que d'una licencia poetica. A costumbre fa que lis se de cosa veyer como se creban ixas promesas.
Manimenos, l'Estau ye dolent y en a suya malotía amenista diners pero no pas ta rescatar as familias que son acotoladas y amarguinadas per a crisi [familias que dimpués de tresbatir os emplegos y as viviendas ya no en tienen aduya denguna per parti d'un Estau cada vegada més anti-social] sino ta rescatar a "bankers", os diners están de nuevas ta rescatar unatra vegada més a ra banca, ixa gran enverenadera d'a nuestra economía, que ya no en puet amagar més os suyos "activos" verenosos adintro una economía global.
As chents que protestan enrabiadas en as carreras son o gran simptoma d'ixa malotía. L'enrabia y l'indignación están a calentura que no remata de puyar en a frent d'un Estau feble, quasi morimundo. En son os globulos blancos, as auto-esfensas d'o nuestro maltreito y radito Estau Social.
Continando con o símil hipocratico, cal remerar-ie as parolas que en traza de resumen explanican platerament as conseqüencias qu'a puyada de l'IVA en tendrá en a dolenta economía espanyola. Parolas que estioron prenunciadas en o Congreso d'os Deputaus un 21 de abril de 2010, pero que valen mesmo t'agora:
"Si la subida del IVA fuese un medicamento, tendría tantas contraindicaciones y tan escasos beneficios que habría que retirarlo del mercado"
"Si a puyada de l'IVA estase un medicamento, en tenerba tantas de contraindicacions y uns tant raditos esquimens que serba menister retirar-ne d'o mercau".
Estié Mariano Rajoy qui prenuncié ixas parolas, allora vocero d'a oposición y enguán matasán de redolín en a economía espanyola. No sembla pos qu'iste siga un buen mecanismo ta sanar ta lo dolent. Més pareix lo mecanismo que un Josef Mengele qualsiquiera fa servir ta nastar l'Estau Social y lo buempasar d'atros tiempos que no en tornarán més con istos caciques.
Platero me se fa que sapen muito bien lo que en son fendo: de totz se conoix que muerto lo cocho, rematada l'enrabia.
Cap comentari:
Publica un comentari a l'entrada
Dixa o tuyo comentario astí