Libia trenca o Debat Nucliar antis d'ubrir-lo

Feban ya quantas semanas qu'en Libia se'n yeran metendo as cosas muito fieras ta las asperanzas democraticas d'o pueblo libio en luita. Encertau ye dizir que Libia ye un país muit suyizo, dominato per clans tribals y que más pareix una guerra cevil qu'atra cosa lo que ye pasando astí. Sin dembargo, Gadafi leva más d'un mes menazando a lo suyo pueblo y matando a aquells que li concaran. Cientos de libios han bosau con a suya vida concarar-se con ell.

Cientos de muertos y una revolución popular que habendo podito contar dende o prencipio con l'achuda europeya y internacional hese estato ganata en una semana nomás. Manimenos, ixa achuda heba luen de ser adhubita. Europa se planteyó masiato tardi cortar as armas que Gadafi emplegaba tantimientres en acotolar a los suyos enemigos y chafar a la repuntada cevil. Países como Rusia u China que están parti de dreito d'o Consello de Seguridat d'a ONU, se oponeban a una entrevención melitar en Libia. Atro como ye Turquia, o solenco país musulmán que ye miembro d'a OTAN, se oponeba de raso  tamién. Y os Estatos Unitos que ya en teneban dos frents que atender en Irak y Afganistán diziban qu'un tercer frent en Libia yera demanar-lis asabelo.

Astí bi yeran as cosas y astí en teneban trazas de continar dica que un nueu feito arrociegó l'intrés mundial. O tierratremo de Chapon y lo posterior Tsunami fición qu'a revolución de Libia  -que s'en yera malmetendo- pasase de sopetón a un segundo plan en os papells de tot o mundo

Mientres, a semana pasata en que escaicié lo tierratremo de Chapón, en Fukushima s´ha estato vivindo una situgación dantesca.  Con fallos en totz os suyos reactors y un alto risque de fusíón d'o nuclio, a chent de tot o mundo ha prencipiato a temer un nueu Chernobyl. Per intes, o drama vivito en Chapón paixeba farchar una grandaria apocalíptica a mida que fallaban china chana os sistemas de refrixeración de totz os suyos reactors.

Situgación au de control dende o prencipio y a solenca cosa que podeban fer os tecnicos i yera liberar gases radioactivos a la morfuga, ta estalviar qu'as vaxiellas d'acero esclatasen una a una per a presión. Istos mesmos gases radioactivos están los qu'agora menazan os alimentos n'as redoladas, perque cantidatz chiquetas de radioactividat  [chiquetas seguntes a versión oficial] han estato trobadas en ells.

Agora que la situgación gracias a poder enchegar a la corrient electrica quantos reactors sobrecalentaus antis prencipia a calmar-se u a lo menos a establizar-se, se produix o "milagro".

O Consello de Seguridat d'as Nacions Unitas reunito con carácter d'urchencia ¿¿¿??? alcuerda una zona d'exclusión aeria sobre Libia ta achudar a los rebeldes. E isto se adhibe sin que Rusia, China uTurquía se opongan y antimás cuenta con o refirme melitar d'o imperio americán.

Agora que tocaba ubrir o debat sobre l'enerchía nucliar en tot o mundo, sobre a inseguridat qu'ista prevoca y sobre l'alto risque n'as poblacions d'a redolada a ixas centrals y potencialment tamién sobre a salut de totz, agora que ya plegaba l'hora de charrar de cosas que mos pertocan a totz dreitament y grau, prencipian una guerra que ya bi yera rematada y perdita per a suya pasividat y connivencia.

Talment os rebeldes no adhiben mai l'obchectivo de redotar a Gadafi, pero a lo menos os aliaus en a suya cuentra, y aquells que lis han premitito fer-lo (Rusia, China) han adhibito que ya no se charre guaire de nucliars ni tampoc no de responsabilidatz per as suyas suicidas políticas enercheticas. Gadafi puet no cayer pero os aliatos pareix que ya han ganato a suya guerra.

Nota: Francia, Reino Unito, Italia, Espanya, totz ells países aliatos en ista nueva "aventura" están deciditament pronucliars. Igual como Estatos Unitos, Rusia, China o Turquía, mesmament. ¿Ye isto coincidencia?