17 de març 2011

Bi'n ha prou de centrals nucliars, bi'n ha prou de mentir-nos a totz!


Dende fa muitas anyadas, puestar que siga dende ixe triste diya 26 de abril de 1986 en que esclató a central nucliar de Chernobyl hemos ascuitau muitas trolas ditas per os tecnicos y más que más per os politicos que nusatros esleximos y que se suposaba que calerba que treballasen ta nusatros y ta nuestra seguridat. Sobretot en as zagueras calendatas se ha podito veyer as meyas verdatz quan no mentiras ubiertas que mos recentaban y continan recentando:


A falsa seguridat de que os nuestros reactors nucliars yeras muito más seguros que os rusos como ixe de Chernobyl ye contrimostrada una fulla igual como ye una fulla o feito de que en Espanya no bi ha risque de tierratremos  perque, anque o tierratremo de Chapón estié de 8.9 graus Richter (un tierratremo con tsunami mesmo y parellana grandaria esferró Lisboa en 1755 ) a verdat ye que os nuestros reactors no son feitos ta endurar parellanos tierratremos d'ixa grandaria sino muito minors- . Y, asinas como ye contrimostrau que os tierratremos chaponeses estioron abastables ta meter ista crisi nucliar mundial que agora veyemos y más tardi enduraremos, igual pasarba en Espanya en o caso de escaicer tierratremos muito más febles. As nuestras centrals nucliars no están libres tampoc de garonas que poderban malmeter os sistemas de refrixeración d'as nuestras centrals simplament con a "gota fría" que cada anyada escaice ta otubre y noviembre en o Devant Espanyol.

Falso ye tamién que a enerchía nucliar siga limpia y barata. Os fanaticos esfensors d'o nucliar mos dicen que ye limpia perque no emita CO2 a la morfuga. Ixo ye cierto. A RADIOACTIVIDAT no emite CO2 que yo sepa. Manimenos no conoix a dengún que bi haiga morito per alentar CO2 y sí que mata a millons alentar l'aire radioactivo.


 



Dicen que ye barata perque no cuentan dentre os suyos costos l'alzar os repuis radioactivos en puesto seguro mientras miles d'anyadas en as que continan estando potencialment letals ta la vida. Ni tampoc no cuentan o costo de desarmar una central ya viella. Ni sisquiá paran en cuenta d'os costos d'una crisi per chiqueta qu'ista siga. En istos diyas se ha cambeyau a lechislación espanyola en caso de crisi nucliar que limita as indemnizacions d'as interpresas nucliars a nomás que 1200 millons de euros.

Tos prexinaz 1200 millons d'euros ta totz os millons de potencials afectaus per a radiación en Fukushima???? En verdat a solenco costo que cuentan ye a materia prima (l'uranio y o plutonio, cuyo costo anque barato perque os americans y rusos que tien grans almacéns d'istos "productos" -lis sobran d'as bombas atomicas que producioron mientres a suya guerra fría- bi son barrenaus per mercar-los y esferse d'ells, cutio estarán más caros que o sol  que brila u l'aire que corre librement.

Per tot isto y muitas cosas más, ya bi'n ha prou de mentiras y ya bi'n ha prou de nucliars. No votaré a dengún partiu politico que no porte en o suyo pograma electoral o cierre incondicional de totas as centrals nucliars que bi ha en territorio espanyol. Aspero que vusatros que leyetz istas parolas faigatz a mesma cosa.


Os míos prexins están hué  con o pueblo chaponés  a qui diseyo muitisma suerte y que planten fuerte en o esdevenidero, ya libres de centrals nucliars..

Cap comentari:

Publica un comentari a l'entrada

Dixa o tuyo comentario astí