Dica Quán?

O pasau mes de febrero o chuez Baltasar Garzón estié condenau per prevaricación en unas ascuitas feitas en o caso Gürtel. En yera o primer d'os tres chuicios que debeba endurar y ixe que li alparta d'a carrera chudicial definitivament. (L'inhabilitación d'o Supremo ye ta 11 anyadas).

 Manimenos la error de Garzón en o suyo oficio chudicial estié haber donato voz a ras victimas d'a dictadura franquista. Os mainates d'ista Espanya, hereus  d'o franquismo, dedicióron que ya i caleba y qu'habeban d'aturar os pietz d'o chuez en antis que fuese més tardi. 


 Dimpués d'estar condenau per o primer chuicio, no i sosprende ni mica ni  brenca  a no dengún que bi haiga estato absuelto d'o segundo, lo de lo Franquismo.  O cabo y a la fin, quí gosará rechirar un afer que ha allerato ya a carrera més eslucernant d'a chudicatura espanyola? Con Garzón difuera de chuego l'impunidat d'os culpables sembla cerenyament guaranciada. Cal qüestionar-se: dica quán? Ista  mesma  qüestión se'n fan muitos coneixitos presonaches d'o cine espanyol en un entranyable vidio adedicau a ras victimas y en afirme a lo chuez Baltasar Garzón. Vidio qu'adchunto astí baixo.

Cal remerar que  més de 115.000 presonas en Espanya remanen enguán en fuesas comuns u mesmo cunetas de camins y carreteras esconeixitas per as suyas parentallas, ixuplidatas per totz menos per as suyas familias que encara lis ploran en a soledat d'as casas suyas en faltar d'un puesto millor . 

Encá muitos més, talmén cientos de miles estioron igual d'afusilaus per a represión faixista d'entre guerra y postguerra,  sin d'advogau ni chuicio chusto. Totz ells aguaitan como  totons  permenaus que lis se faiga chusticia tant y mientres cutio se demanan, igual como en femos a resta... dica quán? "¿Hasta cuándo?"