Cuentra ros desahucios, movilización social

O Partiu Popular y o Socialista s'han negato mientres anyos a prener qualsiquiera traza de mida ta aturar l'anglucia d'os bancos y meter fin ta uno d'os feitos més vergüenyosos y antisocials que vienen alcurrindo en Espanya: os desahucios de cientos de milars de familias. 

PP y PSOE no han dubdato mái a l’hora de ninviar a ra policía ta esfender os intreses bancarios. 

A ros dirichents de totz dos partius lis se vien dando cosa que ros mesmos bancos qu’han prevocato una crisi que mos ha deixato sin ingresos u emplego priven que millons d'espanyols espleiten d'o dreito a ra vivienda que consagra ra nuestra Constitución.

Os gubiernos de totz dos partius, l'anterior de Zapatero y l'actugal de Rajoy, no soque han estato plenament insensibles a ra dolor y ra trachedia que pateixen tantas familias, sino que, ta contrimuestra, no han dubdato mái en ninviar ta ra policía ta esfender os intreses bancarios a pur de zurriagazos y somantas a qui han tractato d'esfender un dreito constitucional tant alacetal y humán. 

Han contrimostrato platerament que l'afecto qu’en dicen sentir per a Constitución en tien una muga tallant: Os intreses d'a banca y ros previlechios d'os banquers, os amos verdaders d'uns partius que mantienen o suyo poder y avantalla electoral gracias a ros ampres y a ras aduyas de toda mena que con infinita bogalidat lis atorgan deinde fa anyos as mesmas entidatz que son inflexibles debant d'as familias sin d’ingresos que no pueden apocar as suyas hipotecas. 

A premidura social ye obligando a que ro gubierno meta en a suya achenda ro cambeo d'una lechislación reaccionaria. 

Manimenos, una vegada més podemos comprebar que garra poder ye invencible debant d’a movilización social. Ha costato cientos de manifestacions y de somantas, nafraus y mesmo muertos, pero per fin a premidura social ye obligando a que ro gubierno s’alticame d’o cambeo d'una lechislación reaccionaria que només vien a proteixer os intreses d'a banca cara los de toda a sociedat. Perque lo qu’en ye alcurrindo ye chustament ixo: Que ra movilización y ra solidaridat ciudadana obligan a ra fin a que ro gubierno y ra oposición muevan pieza y cambeyen una actitut que dica agora ha estato de plena indiferencia. Os feitos son contrimostrando platerament que si no s'hesen feito ras protestas, as manifestacions, as vadas, os concaramientos con a policía, as denuncias y, en definitiva, a respuesta ciudadana debant d'una situación social sinchusta, os desahucios continarban producindo-se indefinidament y deixando a muitas més familias en as carreras. 

Ye muit important que ra chent sepa isto y siga conscient d'o suyo poder, que no creiga melampament que ros partius mayoritarios y ro poder politico han cambeato de posición y dicen estar disposaus agora a modificar a lechislación per iniciativa propia. Solament en fan per efecto d'a premidura y ra movilización social, como ha alcurrito perén que s'han producito enantes favorables a ro buempasar y ra chusticia, contrimostrar asinas a falsedat d'ixes discursos que continament mos dicen que ras vadas, os sendicatos u ras protestas en as carreras no sirven ta cosa. 

Ye per tall ragón que creigo que hemos d'enfuelgar-nos que ro gubierno haiga anunciato a ra fin a suya disposición a resolver o poblema d'os desahucios, perque se contrimuestra asinas a utilidat d'as movilizacions socials y que només con ellas se puet privar que mos saquen os nuestros dreitos més alacetals. 

No call asperar que ni ro gubierno ni ro partiu socialista chuguen limpio agora. 

Pero mesmament perque contrimuestran isto, ye per lo que no hemos de baixar a guardia. Dau ro suyo comportamiento previo, no call asperar que ni ro gubierno ni ro partiu socialista chuguen limpio agora y que de bote y voleyo deixen d'estar esclaus d'a banca que ros financia. Solament podremos asperar que se den solucions efectivas y adequadas a ro drama d'os desahucios si ra movilización social se mantien y se reforza, mesmo en mayor mida qu’antis. 

Agora ye l’inte ta qu’a ciudadanalla faiga veyer que ro que mos chugamos no ye l'adopción de qualsiquiera mena de chandrío legal qu’apolarge l'afer de fundo, sino a guarancia que totz os espanyols y espanyolas puedan espleitar con efectividat d'o dreito constitucional a una vivienda. 

Per ixo, agora ye l’inte de continar empentando ta que no soque se prengan midas que priven os desahucios en ro futur sino ta que se guarencie que remonten a suya vivienda os milars de familias que ra han tresbatido sinchustament y vergüenyosa en istes zaguers anyos. 

Call desichir que se trenque ta cutio con os previlechios legals que han atorgato tant de poder y esquimen a ra banca. 

No podemos consentir que totz dos partius mayoritarios se quieran meter agora una medalla simplament afluixando una mica ra baguera que liga a ras familias més esproteixidas y humildas. Call desichir que se trenque ta cutio con os previlechios legals que han atorgato tant de poder y esquimen a ra banca, no soque reconeixindo a dación en pago, sino aliviando a debda hipotecaria resultant de tasacions artificialment altas, chenerando un parque social de viviendas que premita l'acceso a ellas de qui no disposan d'ingresos abastables retornando, como en he dito, a suya ta qui la han tresbatito istos zaguers. No ye prou con que totz dos grans partius negocien d’entre ells solucions de compromís, segurament escando només qu’o beneplacito d'a banca, sino que han d'ascuitar a ras organizacions y movimientos que han estato en ras carreras esfendendo a ros desahuciaus mientres anyadas ta guarenciar, en definitiva, que ro dreito a ra vivienda siga efectivo ta totz. 

No podemos consentir que se limiten a lavar-li a cara d’os bancos. Se tracta, per cuentra, d'obligar-lis a rescatar agora a ras milentas de familias qu’ístos han allerato. Y ra hestoria y ros feitos recients contrimuestran que con a movilización social sirve, podemos aconsiguir-lo.

Attac, Juan Torres López